кәсіптің көзін тапқан байлықтың өзін табады
эссе

Бейбіт қоғамда бейнет­шіл адамға қалай баюға да қолайлы жағдай жасал­ған. Қайшы алып шаш қисаңыз да, қамшы алып төрт түлік соңына түссеңіз де, кәсіп ашып нәсібін көремін десеңіз де ешкім бетіңізден қақпайды. Тек бойыңызда­ғы жалқаулықты жеңіп, жоспарлы жұмыс жасасаңыз болғаны. Жалқаулық десе, бастауыш сыныпта ұстаз айтқан мына мысал ойыма орала кетеді.Сіздің де есіңізде болар, екі жал­қау есік жабуға ерініп, қақаған суықта қатып өлетіндігі. Бүгінгі біздің нарықтық қоғамда да дәл солай. Әлеуметтік төмен отбасыларға беретін мемлекет­тің жәрдеміне жәутеңдегеннің көжесіне ешкім де қатық қатпайды. Сондықтан белді бекем буып, берекелі іске бет түземесең, «жұтылып» кетуің лезде.«Кәсіптің өзін тапқан байлықтың көзін табады» деген атам қазақ. Біздің кейі­пкеріміз сол аталы сөз­дің астарын аңдап, нағыз білекті түргізіп, маңдайды сүрткізіп, белшеден берекеге кенелтетін адал еңбекті тапқан азамат.